പഠനം ക്ലാസ് മുറിക്കുള്ളിൽ ഒതുങ്ങരുത്

ഒരു മനുഷ്യൻ പഠനം അവസാനിപ്പിക്കുന്ന ദിവസം മുതൽ അയാളുടെ വളർച്ചയും ഒരു പരിധിവരെ അവസാനിക്കുന്നു. കാരണം പഠനം എന്നത് ഒരു സർട്ടിഫിക്കറ്റ് നേടുന്നതോടെ അവസാനിക്കുന്ന ഒന്നല്ല. ജീവിതത്തോടൊപ്പം സഞ്ചരിക്കുന്ന തുടർച്ചയായ പ്രക്രിയയാണ്.

കാലം മാറുന്നു. സാങ്കേതികവിദ്യ മാറുന്നു. ജനങ്ങളുടെ ആവശ്യങ്ങൾ മാറുന്നു. സാമൂഹിക സാഹചര്യങ്ങൾ മാറുന്നു. അതിനനുസരിച്ച് ഭരണസംവിധാനങ്ങളും മാറേണ്ടതുണ്ട്. അതുകൊണ്ടുതന്നെ ഉത്തരവാദിത്വപ്പെട്ട സ്ഥാനങ്ങളിലുള്ളവർ നിരന്തരം പഠിക്കുകയും പുതിയ അറിവുകൾ സ്വീകരിക്കുകയും ചെയ്യേണ്ടത് അനിവാര്യമാണ്.

അടുത്തിടെ കേരളത്തിലെ മന്ത്രിമാർ ഐ.ഐ.എം. പോലുള്ള പ്രമുഖ സ്ഥാപനത്തിലെ പരിശീലന പരിപാടിയിൽ പങ്കെടുത്തത് ഈ പശ്ചാത്തലത്തിൽ ശ്രദ്ധേയമാണ്. ഓരോ വകുപ്പിന്റെയും പ്രവർത്തനം കൂടുതൽ കാര്യക്ഷമമാക്കാനും പുതിയ ആശയങ്ങളും മാനേജ്മെന്റ് രീതികളും പരിചയപ്പെടാനും ഇത്തരം പരിശീലനങ്ങൾ സഹായകരമാകാം.

എന്നാൽ ഇവിടെ നാം ചോദിക്കേണ്ട ഒരു പ്രധാന ചോദ്യമുണ്ട്:

പഠനം മന്ത്രിമാരിൽ മാത്രം ഒതുങ്ങിയാൽ മതിയോ?

തീർച്ചയായും മതിയാകില്ല.

ഓരോ വകുപ്പിനും അതിന്റേതായ സ്വഭാവവും ഉത്തരവാദിത്വങ്ങളും വെല്ലുവിളികളുമുണ്ട്. വിദ്യാഭ്യാസ വകുപ്പിന്റെ പ്രശ്നങ്ങൾ ആരോഗ്യവകുപ്പിന്റേതിൽ നിന്ന് വ്യത്യസ്തമാണ്. സാമൂഹ്യനീതി വകുപ്പിന്റെ ആവശ്യങ്ങൾ തദ്ദേശസ്വയംഭരണ വകുപ്പിന്റേതിൽ നിന്ന് വ്യത്യസ്തമാണ്. വനിതാ-ശിശു വികസനം, വയോജനക്ഷേമം, തൊഴിൽ, കൃഷി, വ്യവസായം തുടങ്ങി ഓരോ മേഖലയ്ക്കും പ്രത്യേകമായ അറിവും സമീപനവും ആവശ്യമാണ്.

അതുകൊണ്ട് ഓരോ വകുപ്പിനും ആവശ്യമായ പ്രത്യേക പരിശീലനവും വിദഗ്ധസഹായവും ഉറപ്പാക്കേണ്ടതുണ്ട്.

ഒരു മന്ത്രിക്ക് ഒരു പൊതുപരിശീലനം ലഭിച്ചതുകൊണ്ട് മാത്രം ഒരു വകുപ്പ് മാറണമെന്നില്ല. ആ അറിവ് വകുപ്പിലെ ഉദ്യോഗസ്ഥരിലേക്കും ജീവനക്കാരിലേക്കും എത്തണം. അവിടെ നിന്ന് താഴെത്തട്ടിൽ ജനങ്ങളുമായി നേരിട്ട് ഇടപെടുന്ന ജീവനക്കാരിലേക്കും എത്തണം.

മുകളിൽ നിന്ന് താഴേത്തട്ടിലേക്ക് ഒരു പഠനസംസ്കാരം വളർന്നുവരണം.

പഠിക്കുക.
പരിശീലിക്കുക.
പ്രയോഗിക്കുക.
ഫലം വിലയിരുത്തുക.
ആവശ്യമായ മാറ്റങ്ങൾ വരുത്തുക.
വീണ്ടും പഠിക്കുക.

ഇത് ഒരു തുടർച്ചയായ ചക്രമായി മാറണം.

ഒരു ബൺ… ഒരു ബ്രാൻഡ്…

ഇത് മനസ്സിലാക്കാൻ ഒരു ചെറിയ ഉദാഹരണം മതി.

നമ്മുടെ കയ്യിലുള്ളത് ഒരു സാധാരണ ബൺ ആണെന്ന് കരുതുക. അത് വെറും ബൺ തന്നെയാണ്. എന്നാൽ അതിനകത്ത് ചീസ്, പച്ചക്കറികൾ, നഗറ്റ്സ് തുടങ്ങിയവ ചേർത്ത്, രുചിയും ഗുണമേന്മയും അവതരണവും ഉറപ്പാക്കി നൽകുമ്പോൾ അതേ സാധാരണ ബൺ തന്നെ കൂടുതൽ മൂല്യമുള്ള ഒരു ഉത്പന്നമായി മാറുന്നു.

ഭരണത്തിലും ഇതുതന്നെയാണ് വേണ്ടത്.

നമ്മുടെ കൈയിലുള്ള സംവിധാനത്തെ അതേപടി മുന്നോട്ടുകൊണ്ടുപോകുന്നതിന് പകരം അതിലേക്ക് പുതിയ അറിവും സാങ്കേതികവിദ്യയും പരിശീലനവും വിദഗ്ദ്ധരുടെ നിർദേശങ്ങളും കാര്യക്ഷമമായ മാനേജ്മെന്റ് രീതികളും ജനകീയമായ സേവനരീതികളും ചേർക്കണം.

അപ്പോഴാണ് ഒരു സാധാരണ സംവിധാനത്തെ കൂടുതൽ കാര്യക്ഷമമായ സംവിധാനമാക്കി മാറ്റാൻ കഴിയുന്നത്.

മനുഷ്യവിഭവശേഷിയെ കണ്ടെത്തണം

ഇതിനേക്കാൾ പ്രധാനപ്പെട്ട മറ്റൊരു കാര്യമുണ്ട്.

കേരളത്തിൽ കഴിവും വിദ്യാഭ്യാസവും അനുഭവസമ്പത്തും ഉള്ള അനേകം ആളുകളുണ്ട്. ഉയർന്ന വിദ്യാഭ്യാസ യോഗ്യത നേടിയവരും ഗവേഷണം നടത്തിയവരും വിവിധ മേഖലകളിൽ വർഷങ്ങളായി പ്രവർത്തിച്ചവരും നമ്മുടെ സമൂഹത്തിലുണ്ട്.

എന്നാൽ എല്ലാവർക്കും അവരുടെ കഴിവിനനുസരിച്ചുള്ള അവസരങ്ങൾ ലഭിക്കുന്നുണ്ടോ എന്നത് ചിന്തിക്കേണ്ട വിഷയമാണ്.

പല കാരണങ്ങളാൽ ചിലർക്ക് മുന്നിലെത്താൻ കഴിയാതെ പോകുന്നു. ശരിയായ അവസരം ലഭിക്കാത്തതുകൊണ്ടും ശരിയായ വേദി ലഭിക്കാത്തതുകൊണ്ടും ചിലരുടെ കഴിവുകൾ സമൂഹത്തിന് പൂർണമായി പ്രയോജനപ്പെടുത്താൻ കഴിയുന്നില്ല.

അതുകൊണ്ട് ഭരണകൂടം കഴിവുള്ള മനുഷ്യരെ കണ്ടെത്തുകയും അവരുടെ യോഗ്യതയും അനുഭവവും കണക്കിലെടുത്ത് അനുയോജ്യമായ മേഖലകളിൽ പ്രയോജനപ്പെടുത്തുകയും ചെയ്യണം.

ഒരു നല്ല ഭരണസംവിധാനത്തിന്റെ ശക്തി കെട്ടിടങ്ങളിലും ഫയലുകളിലും മാത്രം അല്ല.

ശരിയായ കഴിവുള്ള മനുഷ്യരെ ശരിയായ സ്ഥാനത്ത് വിന്യസിക്കുന്നതിലാണ് അതിന്റെ യഥാർത്ഥ ശക്തി.

പരിശീലനം ഒരു നിക്ഷേപമാണ് ജീവനക്കാർക്ക് പരിശീലനം നൽകുന്നത് അധിക ചെലവായി കാണേണ്ടതില്ല. അത് ഭരണത്തിന്റെ ഗുണമേന്മയിലേക്കുള്ള ഒരു നിക്ഷേപമാണ്.

ഒരു പരിശീലന ക്ലാസ് കഴിഞ്ഞപ്പോൾ അതിന്റെ ഫലം ഒരു സർട്ടിഫിക്കറ്റിൽ ഒതുങ്ങരുത്. ആ ക്ലാസിൽ പഠിച്ച ഒരു പുതിയ ആശയം ഒരു ഓഫീസിലെ പ്രവർത്തനരീതിയെ മാറ്റണം. ആ മാറ്റം ഒരു ജീവനക്കാരന്റെ സേവനത്തിൽ പ്രതിഫലിക്കണം. ഒടുവിൽ അതിന്റെ ഗുണം ലഭിക്കേണ്ടത് സാധാരണ ജനങ്ങൾക്കാണ്. അപ്പോഴാണ് പഠനത്തിന് യഥാർത്ഥ അർത്ഥമുണ്ടാകുന്നത്. ക്ലാസ് മുറിയിൽ ലഭിക്കുന്ന അറിവ് ഓഫീസിലെത്തണം. ഓഫീസിലെ മാറ്റം സമൂഹത്തിലെത്തണം.
സമൂഹത്തിലെ മാറ്റം ജനങ്ങളുടെ ജീവിതത്തിൽ പ്രതിഫലിക്കണം. ഇതാണ് പഠനത്തിന്റെ പൂർണചക്രം.

മന്ത്രിമാർക്കും ഉയർന്ന ഉദ്യോഗസ്ഥർക്കും ലഭിക്കുന്ന പരിശീലനത്തോടൊപ്പം ഓരോ വകുപ്പിനും പ്രത്യേകം പരിശീലന സംവിധാനം ഉണ്ടാകുകയും അത് താഴെത്തട്ടിലേക്ക് വ്യാപിക്കുകയും ചെയ്താൽ ഭരണസംവിധാനത്തിന്റെ പ്രവർത്തനക്ഷമത കൂടുതൽ മെച്ചപ്പെടുത്താൻ കഴിയും.

മന്ത്രിമുതൽ താഴെത്തട്ടിലെ ജീവനക്കാരൻ വരെ — ഓരോരുത്തരും പഠിക്കണം, മാറണം, പുതിയ ആശയങ്ങൾ സ്വീകരിക്കണം.

അപ്പോഴേ നമ്മുടെ ഓരോ വകുപ്പിനും പുതിയ ഊർജവും പുതിയ ദിശയും ലഭിക്കൂ.

അവസാനം, ഒരു നല്ല ഭരണത്തിന്റെ ലക്ഷ്യം വലിയ വാക്കുകളല്ല.

ജനങ്ങൾക്ക് ലഭിക്കുന്ന മികച്ച സേവനമാണ്.

(ലേഖിക സോഷ്യോളജിസ്റ്റും, മോട്ടിവേഷണൽ സ്പീക്കറുമാണ് )