സ്വർണവിലയിൽ വീണ്ടും വർദ്ധന, ഇന്നത്തെ നിരക്കറിയാം

തിരുവനന്തപുരം: സംസ്ഥാനത്ത് സ്വർണവിലയിൽ ഇന്ന് നേരിയ വർദ്ധനവ്. ഒരു ഗ്രാം സ്വർണത്തിന് ഇന്ന് 15 രൂപയാണ് വർദ്ധിച്ചത്. പവന് 120 രൂപയും കൂടിയതോടെ 1,13,480 രൂപയാണ് ഇന്നത്തെ സ്വർണവില. ഒരു ഗ്രാമിന്റെ വില 14,185 രൂപയാണ്. ഇന്നലെ ഒരു പവന്റെ വില 1,13,240 രൂപയായിരുന്നു. അതേ സമയം, സംസ്ഥാനത്ത് ഇന്ന് വെള്ളി വില കുറഞ്ഞു. ഇന്ന് ഒരു ഗ്രാം വെള്ളിക്ക് 255 രൂപയും 10 ഗ്രാം വെള്ളിക്ക് 2,550 രൂപയുമാണ് വില.

അന്താരാഷ്ട്ര വിപണിയിലെ ചലനങ്ങളാണ് കേരളത്തിലെ സ്വർണവിലയിലും പ്രധാനമായും പ്രതിഫലിക്കുന്നത്. ആഗോള വിപണിയിൽ സ്വർണവിലയ്ക്ക് പിന്തുണ നൽകുന്ന പ്രധാന ഘടകങ്ങളിൽ പശ്ചിമേഷ്യൻ സംഘർഷങ്ങളിൽ തുടരുന്ന അനിശ്ചിതത്വവും യുഎസ് ഡോളറിലെ മാറ്റങ്ങളും ഉൾപ്പെടുന്നുണ്ട്. അതേസമയം, നിലവിലെ അന്താരാഷ്ട്ര വിപണിയിൽ ഉയർന്ന പലിശനിരക്ക് തുടരാനുള്ള സാദ്ധ്യത സ്വർണവിലയുടെ കുതിപ്പിന് ഒരു പരിധിവരെ സമ്മർദം സൃഷ്ടിക്കുന്നുണ്ട്.

ആഗോളതലത്തിൽ സാമ്പത്തികവും രാഷ്ട്രീയവുമായ അനിശ്ചിതത്വം വർദ്ധിക്കുമ്പോൾ സ്വർണത്തെ സുരക്ഷിത നിക്ഷേപമായി കാണുന്ന പ്രവണത ശക്തമാകുന്നതാണ് സ്വർണവില കൂടുന്നതിന് കാരണമാകുന്നത്. ഇതോടെ സ്വർണത്തിനുള്ള നിക്ഷേപ ആവശ്യകത ഉയരുകയും വിലയ്ക്ക് പിന്തുണ ലഭിക്കുകയും ചെയ്യും.

കേന്ദ്രബാങ്കുകളുടെ വാങ്ങലും ആഗോള സ്വർണവിപണിയിലെ പ്രധാന ഘടകമാണ്. ഇന്ത്യയിലെ സ്വർണവിലയെ അന്താരാഷ്ട്ര നിരക്കിനൊപ്പം ഡോളറിനെതിരെ രൂപയുടെ മൂല്യം, ഇറക്കുമതി ചെലവ്, ആഭ്യന്തര ആവശ്യകത തുടങ്ങിയ ഘടകങ്ങളും സ്വാധീനിക്കുന്നുണ്ട്. അതിനാൽ ആഗോള വിപണിയിൽ ചെറിയ മാറ്റമുണ്ടായാലും കേരളത്തിലെ സ്വർണവിലയിൽ അതിന്റെ പ്രതിഫലനം ഉണ്ടാകാം.